တော်တော်ဦးနှောက်စားတယ် (ဒေါက်တာစိုးသန်း)

တော်တော်ဦးနှောက်စားတယ်

လွန်ခဲ့တဲ့ တစ်နှစ်လောက်က ကျွန်တော် "ဦးနှောက်စားပါရစေ" ဆိုတဲ့ ခေါင်းစဉ်နဲ့ အင်္ဂလိပ်စာနဲ့ ပတ်သက်တဲ့ ကတ်သီးကတ်သတ် မေးခွန်းလေးတွေကို quiz game ပုံစံလေးနဲ့ ဒီမှာရေးပေးဖူးခဲ့ပါတယ်။ အဲဒီအမေးအဖြေလေးတွေကို "ဗိုက်တာမင် ဆောင်းပါးများ" နဲ့ "ချစ်လို့ရေးတာ ဖတ်ပါ" စာအုပ်တွေထဲမှာ ဖော်ပြခဲ့ပါတယ်။ အဲဒီလို ခဲရာခဲဆစ် ဦးနှောက်စားစေတဲ့ ဉာဏ်စမ်းမေးခွန်းလေးတွေကို brain teaser လို့ခေါ်ပါတယ်။ tease ဆိုတာ ကျီစယ်တာ၊ စတာ ဆိုတော့ brain teaser ဆိုတာ ဦးနှောက်ကို အလုပ်ပေးတဲ့ မေးခွန်းပေါ့။ အဲဒီရေးခဲ့တာလေးတွေ သတိရမိလို့ brain အကြောင်း အင်္ဂလိပ်စကားလုံး အသုံးအနှုန်းတွေအကြောင်း ဆက်ပြီးအတွေးနယ်ချဲ့မိတာပါ။

1. ကိုယ်တွေမြန်မာစကားမှာ "ဦးနှောက်ခြောက်တယ်၊ ဦးနှောက်စားတယ်၊ပုဇွန်ဦးနှောက်၊ ဖြုတ်ဦးနှောက်နဲ့လူ" စသည်ဖြင့်အသုံးတွေရှိသလိုပဲ အင်္ဂလိပ်စကားမှာလည်း brain ကိုသုံးထားတဲ့ usage တွေအများကြီးရှိပါတယ်။ အဲဒီများစွာသော အသုံးတွေထဲမှ အသုံးများလို့ သိထားသင့်တဲ့ common expressionတွေ၊ စကားလုံးလေးတွေကို ကောင်းတာနဲ့ ဆိုးတာ၊ positive sense နဲ့ negative sense ဆိုပြီး အုပ်စု နှစ်ခုခွဲပြီး လိုအပ်တဲ့နေရာမှာ နမူနာဝါကျလေးတွေပေးပြီး ရှင်းပြပေးထားပါတယ်။ brain နဲ့ပတ်သက်တဲ့ အင်္ဂလိပ်စာ အသုံးအနှုန်းလေးတွေ စုံလင်စွာ သိထား၊ မှတ်ထားရအောင် ဖတ်ကြည့်ပါ။

💛brain နဲ့ ပတ်သက်လို့ တော်ကြောင်း၊ ကောင်းကြောင်းပြောရန် အသုံးများ

brain ဟာ ဦးနှောက်လို့ literal meaning တိုက်ရိုက်အဓိပ္ပါယ်ရှိသလို လူတစ်ဦးကို brain လို့ခေါ်ညွှန်းလိုက်ရင် သူဟာ လူတော်၊ အသိဉာဏ်ကြီးမားတယ်လို့ အဓိပ္ပါယ်ရတယ်။ ဆိုတော့ကာ brain ရဲ့ figurative meaning ဥပစာ၊ တင်စားသုံးတဲ့ အဓိပ္ပါယ်ကတော့ intellect, intelligence, wisdom စသည်ဖြင့်ပါ။

📍The car accident left him with permanent brain damage.
ကားတိုက်မှုကြောင့် သူဦးနှောက်ထိထားတယ်။ (ဒီဝါကျမှာ brain ဟာ the organ inside the head ခေါင်းထဲက ဦးနှောက်။ literal meaning ပေါ့)

📍You have an amazing brain.
မင်း တော်တော်တော်တဲ့လူ။ ဉာဏ်ကောင်းတယ်။ (ဒီဝါကျမှာ brain ဟာ intelligence ကိုဆိုလိုတာ)

brain ကို s ထည့်လိုက်ရင် brains ဟာ အဓိပ္ပါယ်နှစ်မျိုးဖြစ်သွားပါတယ်။

1. brains= တိရစ္ဆာန် ဦးနှောက်ဟင်းလျာ

2. the brains (singular)
brains ရဲ့ ဒုတိယ အသုံးများတဲ့ အဓိပ္ပါယ်က "လူတော်၊ အကြံပေး ပညာရှင်" ပါ။ brains ဆိုပြီး s ပါပေမဲ့ တစ်ခုကိန်း singular noun ပုံစံနဲ့ သုံးရပါတယ်။ ဥပမာဝါကျတွေကြည့်ပါ။
📍She was the brains behind the whole scheme.
ဒီစီမံချက်တစ်ခုလုံးရဲ့ နောက်ကွယ်မှ အကြံပေးတာ သူပါ။ (အားလုံးဟာ သူ့ရဲ့ ဦးနှောက် စိတ်ကူးဉာဏ်တွေကို သုံးထားတာ)

📍He is the brains behind the success of the company.
သူတော်လို့ ဒီကုမ္ပဏီအောင်မြင်တာ။

🏅ဒီဥပမာဝါကျနှစ်ခုကိုဖတ်ပြီးရင် the brains behind something ဆိုတဲ့ expression ကို အပိုင်ရအောင်မှတ်ထား၊ ကိုယ်တိုင်လည်း ပြန်သုံး လေ့ကျင့်ပါ။

နောက်ဆင်တူရိုးမှာ စကားလုံးတစ်ခုက brainchild ပါ။ ဒီ project ကြီးဟာ ငါ့ရဲ့ brainchild ပါကွာ။ American Idol ပြိုင်ပွဲဟာ Simon Cowell ရဲ့ brainchild ပါ၊ စသည်ဖြင့်ပြောကြတာ ကြားဖူးမှာပေါ့။ brainchild ဆိုတာ သူ့ရဲ့ကိုယ်ပိုင်စိတ်ကူး၊ သူထွင်လိုက်တာ၊ သူမွေးထုတ်လိုက်တဲ့ ကုန်ပစ္စည်းအသစ် စသည်ဖြင့် အဓိပ္ပါယ်ရပါတယ်။

🏅brainchild= someone's idea or invention

နောက်တစ်ခုကတော့ ဦးနှောက်ထဲမှာ လှိုင်းထသွားတာ brainwave တဲ့။
🏅brainwave= a sudden clever idea၊ ရုတ်တရက် အကြံကောင်း ဉာဏ်ကောင်းရခြင်း

📍While watching the children play, I got a brainwave to write a poem.
ကလေးတွေကစားနေကြတာကို ကြည့်ရင်းနဲ့ ကဗျာရေးဖို့ အကြံကောင်း၊ စိတ်ကူးကောင်းလေး ရလိုက်တယ်။

နောက် အသုံးများတဲ့ usage လေးတစ်ခုထပ်ကြည့်ပါ။
🏅to pick someone's brain= ဦးနှောက်ဖောက်စားသည်၊ မေးခွန်းများစွာမေးသည်

📍Whenever we have questions about English grammar, we pick Saya Soe's brain.
ကျွန်တော်တို့ အင်္ဂလိပ်သဒ္ဒါမေးစရာရှိရင် ဆရာစိုးကိုပဲ ဦးနှောက်စားကြတာ။

အသုံးများတဲ့ နောက်ထပ် usage တစ်ခု၊
🏅to rack one's brain= ဦးနှောက်ခြောက်အောင် စဉ်းစားသည်၊
ခေါင်းပူအောင် ပြင်းပြင်းထန်ထန်စဉ်းစားသည်

📍I really racked my brain but I couldn't remember her phone number!
ငါလည်း အသည်းအသန်စဉ်းစားတာပဲ၊ ဒါပေမဲ့ သူ့ရဲ့ ဖုန်းနံပါတ်ကို သတိကိုမရတာ။

📍I've been racking my brain trying to remember his name.
သူ့နာမည် မမှတ်မိလို့ စဉ်းစားတာ ခေါင်းတောင်ခြောက်တယ်။

အခုထပ်ပြောပြမဲ့ စကားလုံးလေးကတော့ သတိထားဖို့လိုတယ်။ British English နဲ့ American English မှာ အဓိပ္ပါယ် မူကွဲလေးတွေရှိနေလို့ပါ။ ဦးနှောက် မုန်တိုင်းကျတာ brainstorm တဲ့။ verb လိုရော noun လိုပါသုံးတယ်။ တကမ္ဘာလုံးမှာ အသုံးများတာကတော့ brainstorm ဆိုရင် ရုံးမှာ၊ စာသင်ခန်းထဲမှာ၊ အစည်းအဝေးမှာ အဖွဲ့ဝင်တွေအားလုံး အကြောင်းအရာတစ်ခုကို အဖြေရှာဖို့၊ စိတ်ကူး အသစ်တွေထွက်လာစေဖို့ အဖွဲ့ဝင်တွေအားလုံး ခေါင်းချင်းရိုက် အဖြေရှာကြတာ၊ အပြင်းအထန်စဉ်းစားကြတာပေါ့။ သို့သော်လည်း British English မှာက brainstorm ကို အခိုက်အတန့် သတိချွတ်ယွင်းသွားတယ်၊ သတိလွတ်သွားတယ် ဆိုတဲ့ အဓိပ္ပါယ်နဲ့လည်း သုံးတတ်ကြတာကို မှတ်စေချင်ပါတယ်။

🏅to brainstorm= to suggest a lot of ideas for a future activity very quickly

📍Remember all new ideas are welcomed. Let's start brainstorming.
စိတ်ကူးအသစ်တွေလိုချင်တာနော်။ ကဲ အားလုံးဝိုင်းစဉ်းစားအကြံပြုကြရအောင်။

brain ကို y ပေါင်းလိုက်ရင် brainy (adjective) ရတယ်။ ဦးနှောက်ကောင်းတယ်၊ စာအရမ်းတော်တယ်၊ super brain တွေပေါ့။
🏅brainy= very smart, very clever

📍His children are all brainy.
သူ့ရဲ့ ကလေးတွေအားလုံး လူတော်တွေချည့်ပဲ။

အပေါ်မှာ brainchild ရဲ့ အဓိပ္ပါယ်ကိုရှင်းပြပေးပြီးပြီနော်။
baby brain ဆိုတဲ့ ထူးခြားတဲ့ အသုံးလေးတစ်ခုလည်း ရှိသေးတယ်။
🏅baby brain ဆိုတာ ကလေးဦးနှောက်လို့ ပြောတာမဟုတ်ပါဘူး။ ကိုယ်ဝန်ဆောင် အမျိုးသမီးတွေမှာ ဖြစ်တတ်လေ့ရှိတဲ့ ခဏခဏမေ့တတ်တာ၊ ရိုးရိုးရှင်းရှင်းကိစ္စလေးတွေတောင်မှ ကြောင်ပြီးအမှားလုပ်မိတာကို baby brain တဲ့။ ဗိုက်ထဲမှာ baby လေးရှိနေတာကိုး။

fog ဆိုတာ မြူ၊ မှိုင်း၊ foggy ကတော့ မြူတွေဆိုင်းနေလို့ ကြည်ကြည်လင်လင်မမြင်ရဘူး။ နောက်ထပ်ပြောပြချင်တဲ့ စကားလုံးတစ်ခုက brain fog တဲ့။

🏅brain fog= ခေါင်းမကြည်၊ ဦးနှောက်မကြည်ဖြစ်ကာ ကောင်းကောင်းမစဉ်းစားနိုင်တာ၊ အာရုံမစိုက်နိုင်တာ

📍Side-effects of the medicine include dizziness and brain fog.
ဒီဆေးရဲ့ ဘေးထွက်ဆိုးကျိုးတွေကတော့ ခေါင်းမူးမယ်၊ ဦးနှောက်မကြည်တာမျိုးဖြစ်လိမ့်မယ်။

ဒီလိုမျိုး brain fog နဲ့ ဆင်တူတဲ့ နောက်စကားလုံးနှစ်ခုကတော့ brain fade နဲ့ brain fart တို့ပါ။

ကဲ... brain အကြောင်း ပထမပိုင်းကို နောက်ဆုံးမှတ်စရာ expression တစ်ခုနဲ့ အဆုံးသတ်ကြစို့။
ကိုယ်မင်းအကြောင်းကိုယ်ပဲ တချိန်လုံးတွေးနေတာ၊ တချိန်လုံး ဒါပဲစဉ်းစားနေတာ (You are always on my mind ဆိုတဲ့ country song လေး သတိရသား) လို့ပြောရင် သုံးတဲ့ to have something on the brain ဆိုတဲ့ အသုံးကောင်းလေးပါ။

🏅have something on the brain= not to be able to stop thinking or talking about one particular thing

📍You've got watches on the brain. Can we talk about something else for a change?
မင်းမလဲ တချိန်လုံး ဒီလက်ပတ်နာရီတွေအကြောင်းပဲ စိတ်ထဲမှာရှိတယ်။ တခြားအကြောင်းလေးများ ပြောင်းပြောပါဦးကွာ။

ပြည့်စုံအောင်ရေးပေးတော့ စာအရမ်းရှည်သွားရင် အာရုံမစိုက်နိုင်ကြမှာစိုးလို့ ဒုတိယပိုင်းကို မနက်ဖြန်ဆက်တင်ပေးပါ့မယ်။

With love,
Dr. Soe Than
April 19, 2018